Björgunarsveitarmanni var refsað af bílstjórum tveggja verulega illa búinna lúxusbifreiða í morgun.
Björgunarsveitarmaðurinn hafði losað bifreiðarnar úr vígalegum skafli, með miklum erfiðismunum og lagni. Í stað þess að þakka honum fyrir brugðust mennirnir illa við, kölluðu hann öllum illum nöfnum, bleyttu hjá honum buxurnar og tróðu snjó innan á hann. Þá stálu þeir af honum húfunni og sögðust ætla að sjá til þess að hann yrði rekinn úr starfi.
Þess má geta að bílstjórarnir bjuggu skaflinn til sjálfir með snjóvél sem þeir festu kaup á fyrir nokkrum árum — og hugðust nota til að búa til skíðaparadís í görðum sínum.
Kona óskast
hið fyrsta til að deila með þrifalegum karlmanni á fertugsaldri vel einangruðu neðanjarðarbyrgi meðan yfirvofandi heimsendir gengur yfir. Má ekki reykja.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.
Hundanafnanefnd hefur samþykkt hundsnafnið Nero en hafnað hundsnafninu Neró. Millinafnið Fenris er samþykkt og sömuleiðis hundsnafnið Þórður og tíkarnafnið Gufubaldína. …
Baggalútur hefur ákveðið að koma til móts við óákveðna kjósendur, sem geta ekki með nokkru móti ákveðið sig, eða hugsað …
Karlmaður um tvítugt liggur þungt haldinn eftir að hafa tekið inn of stóran skammt af svonefndum hip-sterum. Hipsteranotkun er mikið vandamál …
Ríflegur meirihluti landsmanna vill að Sigmundur Davíð Gunnlaugsson, formaður Framsóknarflokksins, verði næsti forsætisráðherra — að því gefnu að hann væri …