Jóna Stefánsdóttir tannlæknir hefur þróað nýja aðferð við endajaxlatöku sem hún kallar "bakdyraleiðina". Byggir aðferðin á því að tannlæknirinn opni sér leið í gegnum hnakka sjúklingsins og dragi endajaxlana út þá leið.
"Þetta er náttúrulega bæði þægilegra fyrir mig og sjúklinginn," sagði Jóna tannlæknir í spjalli við Baggalút. "Ég fæ betra aðgengi og sjúklingurinn þarf ekki að gapa allan tímann."
Þá kveðst Jóna einnig setja rennilás á hnakka sjúklingsins til að hún eigi auðveldara með að fjarlægja fleiri jaxla ef þess gerist þörf síðar meir.
UNGUR MAÐUR
með yfirgripsmikla þekkingu á kjarnaofnum, óskar eftir starfi úti á landi.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.