Mikið upphlaup varð á fundi nefndar um lausn Svalbarðadeilunnar þegar upp komst að túbuleikari nefndarinnar var á mála hjá rússnesku leyniþjónustunni KGB. Að sögn fulltrúa Íslands, Jónasar Jónatanssonar, banjóleikara, var æfing í fullum gangi þegar glöggur klarínettuleikari rak augun í lyklakippu túbuleikarans, merkta KGB. Túbuleikarinn var umsvifalaust sendur heim. „Þetta er mjög leiðinlegt“, sagði Jónas. „Okkur fannst Sergei reyndar alltaf vera grunsamlega góður túbisti, af endurskoðanda að vera“.
Rýmingarsala - vegna óvissu á markaði
Silfurskottueistu, krókódílatár, leðurblökugarnir, marhnútahráki og muldir nykurhófar. Einnig lítið notað finngálkn og blindur urðarköttur. Allt á að seljast. Annars verður ykkur öllum breytt í froska.
Nornabúðin
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.