Norskur búálfur, Ejnar Svenqvist, sem er staddur hér á landi vegna alþjóðaráðstefnu huldufólks, varð fyrir þeirri óskemmtilegu reynslu að öryrki kastaði eldspýtustokk í höfuðið á honum. Fékk búálfurinn vott af heilahristingi, en atvikið var þó ekki alslæmt, því stokkurinn reyndist afar sjaldgæfur.
"..þetta er úr skoskri seríu frá 19. öld," sagði Ejnar, sem sjálfur á stórt safn eldspýtustokka. "..það sem var merkilegast við þessa stokka var að þeir innihéldu ekki eldspýtur, heldur piparmyntur - en það er mjög sjaldgæft."
Borgarlögmenn
óskast til að veita ráðgjöf á öllum sviðum borgarmála. Fullum trúnaði heitið. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.