Það var mikil gleðistund meðal vistfólks á elliheimilinu Grund í morgun þegar þau fundu flöskuskeyti við Reykjavíkurtjörn.
“Fyrir réttum 10 árum síðan sendum við flöskuskeytið af stað frá suðurenda tjarnarinnar,” sagði Mófreður Vilmundsson talsmaður hópsins. “Síðan höfum við komið að norðurendanum á hverjum degi og beðið þess að það láti sjá sig.”
Að sögn Mófreðs var fólk orðið vonlítið um að skeytið skilaði sér, en gafst þó aldrei upp á biðinni. “Þetta hefur tekið sinn toll, enda við öll mjög tímabundin, en það borgaði sig sannarlega,” sagði hann að lokum.
Eftir fundinn var flöskuskeytið sent aftur af stað og nú er að sjá hvort það skili sér við suðurendann aftur.
Húshjálp
Óska eftir að ráða útrásarvíking eða sbr. til að aðstoða við létt heimilisstörf og viðrun seníls gamalmennis. Gott kaup.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.