Síamstvíburarnir Björn og Hilmar hafa verið samvaxnir á fingrum og skeggi í fjölmörg ár og hafa mátt þola háðsglósur nábúa sinna fyrir vikið.
"Svona hefur þetta alltaf verið," segir Bjössi og Hilmar tekur undir: "Já, fötlun okkar hefur aldrei mætt skilningi, ekki einu sinni hjá stjórnvöldum - því lög um síamsfæðingar ná ekki yfir okkur þar sem við erum ekki blóðskyldir. Bjössi var sko ættleiddur."
Bræðurnir sjá þó fram á bót meina sinna fljótlega. "..já, við ætlum að leita örþrifaráða með vorinu, en við eigum pantaðan tíma á hárgreiðslustofu á Blönduósi í júní. Svo er bara að bíða og sjá til," segir Bjössi glaðbeittur að lokum og horfir björtum augum til framtíðar.
Sniffarar
Ný sending af öllum oktönum!
Skeljungur
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.