Fyrsti lautinant í FramHuld, félagi herskárra framsóknarálfa og flugvallarsinnaðs huldufólks harmar ummæli formanns fjármálanefndar, Vigdísar hvaðhúnnúheitiraftur.
„Mér finnst ansi aumt að ráðast svona á helsta bakland framsóknar í gegnum aldirnar, huldufólkið og jafnvel álfana. Það er algerlega út í hött að bendla okkur við einhverjar hrygglausar kommúnistakellingar, sem hafa markvisst reynt að grafa undan hernaðarmætti okkar og talað okkur niður,“ segir lautinantinn, og er ljóst að honum svíða ummælin mjög.
„Við eigum betra skilið eftir að hafa komið þessu lifandi dauða flokksþunnildi hennar til bjargar, hvað eftir fokking annað. Ég meina, hvaðan heldur hún að fylgi framsóknarflokksins komi — úr þjóðskrá!?“
„Amma“ óskast
í skiptum fyrir vel með farinn móðurbróður. Á sama stað fást ljúffengir nýgotnir blendingshvolpar. Getum úrbeinað fyrir þá sem vilja.
a.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.