Arnaldur Waage, smiður, vann það feykilega afrek í dag að hjóla frá Mjóddinni í Reykjavík og alla leið til Hafnarfjarðar.
Arnaldur var mjög þrekaður eftir átökin, en sáttur. "..þetta var erfitt, en það hafðist að lokum. Ég hef nokkrum sinnum reynt þetta en aldrei komist nema í mesta lagi í Garðabæinn. En núna lék lánið við mig - og áttin var líka hagstæð."
Arnaldur hefur verið gerður að heiðursborgara í Hafnarfirði og hefur ánafnað náttúrugripasafni staðarins líkama sinn til uppstoppunar að sér látnum.
Til sölu
Fullkominn búnaður til langra ferðalaga um útgeim. Talsvert notaður. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.