Markvörður utandeildarliðsins Flotfaxa neitar að verja mark liðsins á komandi keppnistímabili — og hefur sagt sig frá vörslu marksins.
Telur hann að undirbúningstími fyrir fyrsta leik keppnistímabilsins — gegn liði Reynis, Hnífsdal — sé allt of knappur. Auk þess vill hann meina að markið sem hann ver hafi ekki fengið sanngjarna meðferð á æfingatímabilinu, talsvert meira hafi verið sótt að því en mörkum annarra liða og leikmenn hafi skotið allt of föstum skotum að því. Því sjái hann sér ekki fært að verja það að öllu óbreyttu.
Þjálfari liðsins bendir á að markvörðurinn hafi fengið feykinógan tíma til að undirbúa sig, hann sé einfaldlega skíthræddur við boltann og eigi bara að drullast til að mæta — eða finna sér eitthvað annað að gera.
Einkamál
síamstvíburar á fimmtugsaldri óska eftir að komast í kynni við eldri karlmann. Með nánari kynni í huga. A.v.á.
Ég sé að fullháttvirtur forseti hins háa Alþingis er með eitthvað bakkaklór eftir ömurðarveisluna sem hann hélt á Völlunum að viðstöddu fámenni í gær.
„Forseti Alþingis harmar að heimsókn danska þingforsetans hafi verið notuð til að varpa skugga á hátíðarhöldin og leyfir sér að trúa því að það sé minnihlutasjónarmið að viðeigandi sé að sýna danska þingforsetanum óvirðingu þegar hann sækir okkur heim og kemur fram fyrir hönd danska Þjóðþingsins og dönsku þjóðarinnar.“ — segir forseti.
Ég mótmæli herra forseti.
Þessi vanhugsaða og alls óvelkomna heimsókn var hreint ekki „notuð“ til að varpa skugga á fjölmilljónapartíið þitt. Heiðursgesturinn flóttalegi sá alveg sjálfur um að varpa sínum skoðanamyrka skugga á hátíðahöldin og eyðileggja þau gersamlega.
Það eru miklu fremur Danir sem sýna okkur óvirðingu með því að senda þessa útdönkuðu rasistapíu hingað — og skömmin er þeirra að púkka upp á hana sem þingforseta yfirhöfuð.
Það er nefnilega míkróminnihlutasjónarmið að halda að það sé í lagi að dubba upp rauðklædda rasista og leiða til hásætis á hátíðarþingfundi á sjálfu Lögbergi. Og það að gera lítið úr gagnrýni á þetta skipulagsslys er ekkert annað ómerkilegt yfirklór og eftirámjálm.
Svo eiga menn bara að drullufrussfretast til að biðjast afsökunar á klúðrinu í stað þess að barma sér undan eðlilegum viðbrögðum við þessum skammarlega undirlægju– og druslugunguhætti.
Góðar stundir.