Fylgi framsóknarflokksins mælist nú um 50% í lýðveldinu Malawí. Aðrir íslenskir flokkar komast ekki á blað.
Svo virðist sem ungt fólk í Malaví telji að það þurfi ekki að mæta í skólann ef framsóknarflokkurinn kemst til valda. Eins er eldra fólk mjög tortryggið út í Evrópusambandið, sem það telur samtök illra töfralækna — rétt eins og íslenskir framsóknarmenn.
„Ég veit ekki almennilega hvað er í gangi,“ segir stjórnmálafræðingur sem Baggalútur ræddi við. „Það virðist vera einhver alþjóðleg bylgja með framsókn þessa dagana. Flokkurinn er að trenda svakalega á twitter, sérstaklega #KeepItRealViggaHauks og ég veit til þess að fólk er í hópum að snapchatta Sigmund Davíð — og ekki bara einhverjir bangsastrákar.“
Húsnæði óskast
Rótgróin vélhjólasamtök, reyklaus, óska eftir að leigja lítið einbýli miðsvæðis í Rvk. Skilvísum greiðslum heitið.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.