Rúmlega sextugur karlmaður var í morgun dæmdur í átján mánaða fangelsi fyrir að hafa misnotað greiðslukort „Fógetans í Þingholtsskíri“ sem svo er kallaður.
Maðurinn var ákærður fyrir að hafa stolið alls tæplega 39 milljónum af kortinu, sem hann komst í á skemmtistaðnum „Sífulla síkópatanum“ árið 2007.
Hann tók milljónirnar út í 32 færslum og sagðist hafa notað þær til þess að reisa meðferðarheimili fyrir fíknisjúklinga og útigangsmenn í Hljómskálagarðinum, en gat þó ekki lagt fram nein gögn þess efnis.
Gefins
Fullt af gömlu ónýtu drasli. Einnig fæst ódýrt á sama stað 1000 púsla púsluspil sem vantar 327 púsl í.
A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.