Margir álfar eru illa haldnir af brunasárum og sóteitrun eftir þrettándann, en þá tíðkast sem kunnugt er svokallaðar álfabrennur.
Að sögn forsvarsmanns álfa, huldu- og transparentfólks á Íslandi eru þessar ofsóknir með öllu óásættanlegar: „Þetta var kannski voða fyndið fyrst, en það gengur ekki að maður endi jólin trekk í trekk á að kasta upp sóti í gerónýtum litklæðum og með kolsvartar skikkjur og sokkabuxurnar brunnar inn í holdið.“
Forsvarsmenn álfabrenna gefa þó lítið út á þetta, segja álfana ómissandi hluta af jólahaldinu, þeir gefi frá sér einstaklega skemmtileg hljóð og séu auk þess merkilega fljótir að jafna sig.
„Þeim er líka velkomið að redda okkur dvergum, þá látum við þá í friði.“
Vélmenni
128K HOME-SABER 2000 vélmenni með uppvasks- og ryksugunaruppfærslu fæst keypt gegn sanngjörnu verði eða í skiptum fyrir asíska unaðsdúkku. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.