Sá fáheyrði atburður átti sér stað nú í morgun að Jón Ásgeir Jóhannesson forstjóri Baugs mætti í vinnuna í sömu jakkafötum og í gær. "Þetta kom okkur algjörlega í opna skjöldu, ég vona bara að fyrirtækið sé ekki að fara á hausinn" sagði skrifstofustúlka hjá Baugi sem ekki vildi láta nafns síns getið. Sérfræðingar á fjármálamarkaði túlka þetta á þann veg að Jón hljóti að standa afar höllum fæti í valdabaráttunni innan Íslandsbanka.
Þess er nú beðið með mikilli eftirvæntingu hvort Jón Ásgeir muni einnig þvo sér um hárið, en það væri talið augljóst merki um fallandi veldi þeirra Bónus-feðga.
Ný sending
Kúamjólkin vinsæla komin í verslanir okkar.
Kjörval
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.