Baggalútur fékk nokkra helstu starfandi álitsgjafa landsins til að leggja faglegt mat á gosið í Grímsvötnum, sem vakið hefur mikla og verðskuldaða athygli undanfarna daga.
Að sögn eins álitsgjafa er nýja gosið 'ofboðslega fótógenískt en pínu tilgerðarlegt'. Annar segir það 'reyna aðeins of mikið' og vera 'strax orðið pínu þreytt'. Enn einn segir það 'fyrirsjáanlegt' og 'dæmigerða íslenska lummu'.
Þá eru menn sammála um að gosið núna sé í raun bara léleg stæling á Eyjafjallajökli í fyrra og eigi aldrei eftir að ná 'sama hæpi' og 'sósíal impakti'. Íslensk gos séu einfaldlega 'óldnjús' úti í heimi.
Burðardýr
vantar til að flytja morfín og kólalauf til meginlands Evrópu. Þurfa að hafa aðgang að eigin bifreið. Ágæt þóknun. Afgr. vísar á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.