Eðvarð Kárason símsmiður og Þór Wahtne fyrrverandi smíðakennari, fundu ástina í Vesturbæjarlauginni á dögunum. Eðvarð, sem var nemandi Þórs á árum áður sagðist alltaf hafa verið hrifinn af sínum gamla kennara og þegar þeir hittust fyrir tilviljun í heitasta pottinum í laugunum blossaði ástin upp milli þeirra. Þór segir Eðvarð alltaf hafa verið prýðisgóðan nemanda, og hann hafi haft augastað á honum síðan í 9. bekk, en aldrei látið á neinu bera, fyrr en þeir fundu hvor annan á nýjan leik í laugunum. Þeir búa nú saman í herbergi Þórs á Hrafnistu og hyggjast ganga í hjónaband með vorinu.
Til sölu!
Vegna flutninga: Þvagleggur (2 m, gagnsætt plast), stómapoki (4 lítra - sem nýr) og reiðhjólapumpa (þarfnast viðgerða). Tilboð óskast. Áhugasamir snúi sér til afgreiðslu.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.