Davíð Oddsson hefur enn einu sinni komið almenningi á óvart með skipan Tómasar Olrichs í embætti menntamálaráðherra. Sem kunnugt er hafði Björn Bjarnason þegar tilnefnt Andrés Gröndal sem eftirmann sinn, eins og Baggalútur greindi frá í frétt.
Mikil óvissa og óöryggi ríkir nú innan Sjálfstæðisflokks, sem og annars staðar, því enginn virðist kannast við téðan Tómas, sem hefur þó, samkvæmt stimpilklukku Alþingis, verið þingmaður um nokkurt skeið. Baggalútur hefur þó eftir heimildamanni úr innsta hring að þarna sé um að ræða gamlan félaga Davíðs; ímyndaðan vin hans úr gagnfræðaskóla, sem gekk undir nafninu Tommi Olræt.
Davíð virðist nú hafa endurnýjað kynni sín af þessum gamla kunningja og er skýringin sennilega sú að hann er hættur að treysta "raunverulegum" vinum sínum, sem hafa komið aftan að honum unnvörpum undanfarið.
Einkamál
karlmaður á sjötugsaldri óskar ekki eftir að kynnast neinum. Allra síst með nánari kynni í huga. Þið getið bara fokkað ykkur. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.