Gunnar “box” Birgisson hefur hótað að grípa til örþrifaráða verði hann ekki menntamálaráðherra, en Davíð Oddsson mun leggja fram tillögu um eftirmann Björns Bjarnasonar síðar í dag.
“Síðan ég var kosinn á þing fyrir þremur árum, hef ég unnið alls konar skítverk fyrir hina í Flokknum, svo ég á eitthvað skilið í staðinn, þannig virkar pólitík,” sagði Gunnar í spjalli við Baggalút, en hann er einnig í framboði til bæjar-stjórnar í Kópavogi.
En hvaða örþrifaráð er hann að tala um? “Ég er með slatta af “gúddvill” hjá Hnefaleikasam-bandi Íslands. Það væri voða leiðinlegt ef Davíð tilnefndi einhvern annan en mig og nefbrotnaði svo strax eftir á...” sagði ráðherrann verðandi að lokum.
Bleik ský
Lítið notuð bleik ský til sölu. Svífa 5–10 metra, halda 100 kg.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.