Karlmaður á sextugsaldri hefur ákveðið að bjóða blíðu sína á Laugaveginum næstu daga, endurgjaldslaust.
„Þetta er svona smá tilboð, í takmarkaðan tíma ... bara svona fyrstir koma, fyrstir fá,“ segir maðurinn glaðlega og þvertekur fyrir að hann sé með þessu að undirbjóða rótgróinn og gróskumikinn vændismarkað á þessu svæði.
„Alls, alls ekki, ég ber mikla virðingu fyrir störfum þessa fólks. Þetta er meira svona viðbót, í raun bara góðgerðastarfsemi. Ég kom afskaplega vel undan hruninu, fjárhagslega - og lít á þetta sem smá viðleitni til að gefa dálítið aftur til samfélagsins.“
Útfrymi
Þarf vegna lífstjörnuflutninga að losa mig við mikið magn útfrymis. Tilboð óskast.
Gísli miðill.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.