Kínverska karókísamsteypan Dularfulla stjarnan hefur eignast ráðandi hlut í íslensku leik- og söngkonunni Björk.
Kínverjarnir náðu eignarhaldinu eftir ýmsum krókaleiðum, en svo virðist sem söngkonan hafi að stórum hluta verið í eigu lapplenskra frostgígjusmiða og nepalskra karókímunka.
Hafa tónlistarunnendur miklar áhyggjur af því að Kínverjar flytji starfsemi Bjarkar til Kína – en slái hún í gegn þar gæti það haft verulega alvarlegar afleiðingar fyrir þróun tónlistar á heimsvísu.
Ertu í sorgarferli?
Ekki byrgja reiðina inni. Erum að ráða núna.
Handrukkun Bússa og Valda.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.