Fjárhags-, og tilvistarlegri endurskipulagningu Magnúsar Magnússonar, óreiðumanns, er loks formlega lokið eftir alllangt ferli.
Er hún þríþætt. Í fyrsta lagi er um hlutafjáraukningu að ræða, en móðir Magnúsar (Matthildur Sörensen, hjúkrunarfr.) mun leggja honum til aukið hlutafé, alls 220 þúsund krónur. Í annan stað hafa stærstu lánveitendur Magnúsar (systir hans Guðlaug og móðir hans) skuldbreytt 187.000 kr. í nýtt hlutafé að upphæð 128.000 kr. að nafnvirði.
Þá hefur tekist að lækka vaxtabyrði Magnúsar um ríflega 112.000 kr. með yfirfærslum og sölu á eignum (Playstation 3 leikjatölvu og Stjörnustríðsleikföngum).
Voru samningar þessa efnis undirritaðir í morgun, á heimili Matthildar, þar sem Magnús mun dvelja um óákveðinn tíma.
Viðarsúla afhjúpuð í Friðey
En þér er heldur ekki boðið þangað.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.