„Morðóðir sjimpansapar, sem aðhyllast ýmist kommúnisma, anarkisma, eða bæði – eru í þann mund að taka yfir Reykjavíkurborg. Eru borgarbúar beðnir um að hamstra dósamat og þurrvörur eftir fremsta megni og freista þess að halda sig innandyra næstu fjögur árin. Öll samfélagsleg þjónusta mun leggjast af á næstu dögum, vatnsbólum verður spillt og farsóttir munu í kjölfarið breiðast út. Þeim sem eiga þess kost er bent á að flýja tafarlaust til Garðabæjar eða út á Seltjarnarnes, þar sem sjimpansarnir þrífast illa, eða ekki. Guð blessi Reykjavík.“
Baggalútur var beðinn að koma þessari tilkynningu á framfæri frá forystu sjálfstæðismanna í borginni.
Rýmingarsala - vegna óvissu á markaði
Silfurskottueistu, krókódílatár, leðurblökugarnir, marhnútahráki og muldir nykurhófar. Einnig lítið notað finngálkn og blindur urðarköttur. Allt á að seljast. Annars verður ykkur öllum breytt í froska.
Nornabúðin
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.