Samtökin E80U (European Eighties Union), sem berjast fyrir viðurkenningu og viðhaldi svokallaðrar eitís-menningar í heimsálfunni, hafa sent frá sér yfirlýsingu þar sem þau harma það sem þau kalla „svívirðilega aðför að þeim sómahjónum“ Jóni Ágeiri Jóhannessyni og Ingibjörgu Pálmadóttur.
„Það þarf sterk bein til þess að ganga hnarrreistur um götur evrópskra stórborga með sítt að aftan í dag. John Oscar hefur ekki látið aðkast og ósvífna brandara hafa nein áhrif á sig og hann er enn jafn stoltur af glæstum makkanum og hann var árið 1989,“ segir í yfirlýsingunni.
„Reisn þessa stórkostlega áratugar holdgervist síðan í hönnun Ingu Palm. Hver annar myndi þora að innrétta rándýrar snekkjur og einkaþotur eins og herbergi fermingarstúlku frá árinu 1986? Krómaðir rúmgaflar, glerborð, ótal speglar, ásamt gjáandi svörtum barborðum gera hönnun hennar að merkasta minnisvarða okkar tíma um horfinn menningarheim.“
Samtökin krefjast þess að íslensk stjórnvöld hætti þegar í stað öllum afskiptum af þeim hjónum og biðji þau opinberlega afsökunar.
Blökkumenn
Ýmsar stærðir. Ýmsir litir.
Mansal Magnúsar. Kópavogi.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.