Ungur Breiðhyltingur, Graham Snær Hasseldorf, hefur skorað á Jóhönnu Sigurðardóttur, forsætisráðherra í tölvuleiknum Mortal Kombat II.
Reglurnar eru einfaldar, ef Graham vinnur fær hann allar sínar skuldir afskrifaðar, en ef Jóhanna vinnur þá má hún eiga hann – og gera það sem henni sýnist við hann.
Sigurvegarinn hlýtur að auki titilinn Mortal Kombat II meistari Breiðholts 2010.
Graham segir að þessi lausn hafi reynst föður hans vel, þegar hann vann aftur eiginkonu sína og sumarbústað í ævintýralegu Ms. Pac-Man einvígi við Albert Guðmundsson árið 1983.
Viltu lífga upp á samkvæmið?
hef mikið framboð skemmtikrafta í barnaafmæli, fermingarveislur, steggja- og gæsaboð o.s.frv. Mjög sanngjarnt verð. Umboðsmaður Alþingis.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.