Bergur Blóðbergz, hafnsögumaður og listmálari, sem gegnir listamannsnafninu „Rauði Rex“, hefur enn eitt árið verið sniðgenginn við úthlutun listamannalauna. Í yfirlýsingu frá Bergi kemur fram að hann sé búinn að halda fimm einkasýningar á árinu og taka þátt í þremur samsýningum, auk þess sem fjöldi listunnanda hafi ljáð máls á því að kaupa einhver af verkum hans, eða amk. fá þau gefins. Því skjóti það afar skökku við að hann sé enn eitt árið hundsaður af „hinni forpokuðu listaelítu sem hefur ekki einu sinni stigið á bak hesti, hvað þá skotið vísund“.
Saurfíklar athugið!
Kynngimögnuðu krypplingafóstrin komin aftur – einnig fyrirliggjandi mikið af notuðum panel (ATH. ekki kanil).
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.