Samgönguráðuneytið hefur sent frá sér fréttatilkynningu þess efnis að öllum framkvæmdum sem varða brýr og jarðgöng verði frestað. Í stað þeirra verður ráðist í þróun svokallaðra ormagangna.
Að sögn samgönguráðherra er tæknin, sem byggir á hugmyndum Dr. Insols hjá NASA, langt á veg komin og stefnt er að því að vígja fyrstu göngin, milli Reykjavíkur og Egilsstaða um mitt næsta sumar. Ormagöngin munu að sögn ráðherra spara bæði tíma og eldsneyti, en nokkuð kostnaðarsamt er að byggja slík göng.
Áætlaður kostnaður við fyrstu göngin er um 590 milljarðar króna, og verður bygging þeirra að mestu fjármögnuð með sölu ríkisfyrirtækja.
Þarftu að láta þjóðnýta fyrirtækið?
Hafðu samband við þjónustufulltrúa okkar og við ráðleggjum þér.
Seðlabankinn – sameiningarafl í almannaeign
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.