Skuldabréf tryggt með veði í 12 manna fjölskyldu á Álftanesi er hluti eignasafns sem íslenska ríkið lagði Sjóvá til, svo rekstur félagsins gæti haldið áfram.
Skuldabréfið er að fjárhæð tæplega 865 milljónir króna og er útgefið af rekstrafélagi fjölskyldunnar, sem hefur séð um almennan rekstur hennar og viðhald um árabil.
Er þessi niðurstaða töluvert áfall fyrir ættföðurinn og stjórnarformann fjölskyldunnar, en hann hafði áætlað að hún rynni óskipt til Sjálfstæðisflokksins eftir sinn dag.
Einkamál
síamstvíburar á fimmtugsaldri óska eftir að komast í kynni við eldri karlmann. Með nánari kynni í huga. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.