Jólasveinninn Þvörusleikir hefur sagt skilið við félaga sína í Jólasveinunum og hyggst framvegis einbeita sér að sólóferli sínum.
Þvörusleikir, eða Dr. Þvari, eins og hann kallar sig nú ætlar að veita töluvert meiri þjónustu en bræður hans og teygja hana yfir allt árið. Hyggst hann m.a. bjóða upp á skógjafir fyrir páska og frídag verslunarmanna – auk þess sem hann ætlar sér stóra hluti á jólaballamarkaði næsta sumar.
Ekki hefur enn verið ráðið í stöðu Þvörusleikis innan Jólasveinanna, en samkvæmt heimildum Baggalúts íhuga þeir sterklega að yngja upp í hópnum og jafnvel ráða „einn svartan“ til að fylla skarðið.
Ofurhetja
óskar eftir verkefnum við hæfi. Áralöng reynsla. Getur flogið stuttar vegalengdir.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.