Skífan hefur ákveðið að endurútgefa allar hljómplötur Megasar á árinu. “Við ætlum að vera svolítið góðir við kallgreyið, hann er svo blankur um þessar mundir,” sagði Jón Ólafsson forstjóri Skífunnar í viðtali við Baggalút.
“Plöturnar verða ekki bara hljóðblandaðar upp á nýtt, heldur verður allur hljóðfæra-leikur útsettur og tekinn upp aftur af Gunnari Þórðarsyni enda var spiliríið oft svolítið “reykt”, sérstaklega á fyrstu plötunum. Þá er oft erfitt að heyra hvað kallinn er að syngja um, svo við höfum fengið Björgvin Halldórsson til að syngja lögin, hann er orðinn sérfræðingur í að flytja Megasarlögin eins og á að gera þau. Textarnir eru líka oft ruglingslegir og gamaldags, svo við höfum fengið Stefán Hilmarsson til að endurskrifa þá og Einar Bárðarson mun svo sjá um að gera lögin betri, laga svona það sem var ekkert spes.”
Aðspurður sagði Megas þetta um málið: “Bara meika böns of monní og splæsa í eina.”
Drekaflugur
Ertu á leið á drekaveiðar? Eigum mikið af góðum, handunnum flugum - einnig spúna og maðka. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.