Glæsileg sumarhöll Björgólfsfeðga á í vök að verjast vegna ágangs vatns og vinda. Er nú svo komið að þessi smekklega 14 hæða smaragðsklædda kristalsbygging er nú því sem næst hrunin til grunna.
Voru þeir feðgar margsinnis varaðir við að reisa bygginguna á sandi - óvarða fyrir miskunnarlausu briminu allt um kring. Þeir blésu þó á allt slíkt tal, enda byggðu þeir arkitektúrinn á spánnýjum eðlisfræðilögmálum sem þeir létu hanna sérstaklega fyrir sig í útlöndum.
Ukuleleleikarar
Tek að mér stillingar á G, A og E - strengjum. Fullum trúnaði heitið.
A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.