Rithöfundurinn og athafnamaðurinn Ólafur Jóhann Ólafsson hefur sent frá sér nokkrar nýjar bækur. Þetta eru skáldsögurnar Vopnin kvödd, sem Ólafur Jóhann skrifaði í hjáverkum meðan hann vann hjá Sony, Stríð og friður sem hann skrifaði nú milli jóla nýárs og síðast en ekki síst Íslandsklukkan, sem Ólafur Jóhann skrifaði í sumarbúðum KFUM og K árið 1975.
Ekki er búist við að Ólafi gefist mikill tími til að fylgja þessum nýju bókum eftir, enda er hann önnum kafinn við gerð næstu tveggja skáldsagna sinna, sem nefnast munu Þrúgur reiðinnar og Hringadrottinssaga.
Skipti
NKOTB safnið +a vínyl fæst í skiptum fyrir vel með farnar Slayer plötur og/eða snældur. Afgreiðsla vísar á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.