Konudagurinn svokallaði er í dag, en undanfarin ár hefur skapast falleg hefð fyrir því að á þessum degi geri karlar vel við konur sínar, dekri við þær og hrósi þeim venju fremur fyrir matseld, þvotta og og önnur heimilisstörf. Einnig eru dæmi um að menn hleypi konum sínum eftirlitslaust út á meðal almennings og gauki jafnvel að þeim dulitlum vasapeningum til að gera sér glaðan dag.
Hefð er fyrir því að ríkisstjórn Íslands veiti konum ákveðin réttindi á þessum degi og verður ekki undantekning þar á í ár. Munu konur því hafa kosningarétt til jafns á við karlmenn, fram til miðnættis í kvöld.
Þjóðarbú
Vorum að fá í einkasölu, fallegt þjóðarbú. Á besta stað, miðsvæðis á Atlantshafi. Búið þarfnast töluverðs viðhalds og fæst gegn yfirtöku skulda. Eigna- og hárþvottamiðstöð Snúlla og Dúlla.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.