Ingólfur Örnuson, líksnyrtir, kveðst í dag tilbúinn að fyrirgefa leikaranum Tom Cruise fyrir að hafa litað hár sitt ljóst fyrir hlutverk Lestats í kvikmyndinni Interview with the Vampire frá árinu 1994.
Ingólfur var á sínum tíma afar ósáttur við hárlit leikarans í myndinni og skrifaði fjölmargar greinar í dagblöð vegna málsins. Kallaði hann Tom meðal annars „undirgefna hóru markaðsmanna“ og „skjálgtenntan svikadverg“. Á sama tíma leysti hann upp aðdáendaklúbb Tom Cruise á Íslandi, sem hann var sjálfur í forsvari fyrir.
Ingólfur telur ljóst að Tom hafi séð að sér á þeim tíma sem liðinn er, hann hafi endurheimt sinn fallega svarbláa náttúrulega hárlit og ætti skilið að fá annað tækifæri. Hefur Ingólfur sent Tom sjálfum bréf þess efnis að honum sé hér með fyrirgefið og að aðdáendaklúbburinn Top Gun, Hvammstanga, hafi tekið aftur til starfa - til reynslu.
Allt fyrr perrann!
Perrajakkar, perrabuxur, perraskór, perrasokkar.
Perragarðurinn.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.