Spámennirnir kunnu, Jesú Kristur, Múhameð og Búdda komu saman í dag ásamt fílaguðnum Ganesha í Norræna húsinu og kynntu ný trúarbrögð, sem þeir hafa verið að þróa undanfarin ár í samstarfi við gosdrykkjaframleiðandann Coca-Cola.
Fór vel á með þeim félögum, sem ekki hafa komið fram saman opinberlega áður. Vilja þeir með þessu framtaki sínu leggja fram ákveðna málamiðlun í trúmálum heimsins, en eins og Múhameð orðaði það, þá er „gamla sjittið orðið meira og minna úrelt“ og nokkuð um að fólk sé að misskilja „ákveðin prinsippatriði“.
Kynntu þeir við sama tilefni nýtt grundvallarrit, sem þeir kalla einfaldlega „Hlunkinn“ og er honum ætlað að leysa af hólmi önnur trúarrit. Megináhersla er á grafíska framsetningu og auðskiljanlegar dæmisögur úr daglega lífinu - auk þess sem sérstakur DVD diskur fylgir útgáfunni, stútfullur af aukaefni sem sjálfur Guð almáttugur valdi fyrir útgáfuna.
Foreldrar: Eyðið tíma með börnum ykkar
Mótmælaaðgerðir eru kjörið tækifæri til samveru barna og foreldra. Ráðumst saman á lögguófétin og björgum þannig börnunum frá drykkju og slæmum félagsskap.
Lýðveldisheilsustöð
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.