Ólafur Hálfdánarson fyrrverandi skemmtikraftur er skilinn við eiginkonu sína til 40 ára, Valgerði Wiium, en þau hjónin gerðu garðinn frægan á árum áður með skemmtidagskrá sinni sem þau fluttu sleitulaust í 20 ár á Skansinum í Stokkhólmi.
„Hún var bara orðin svo voðalegur vargur,“ segir Ólafur. „Ætli bransinn og frægðin hafi ekki bara farið svona illa með hana. Maður hefur verið ótta-vesalingur svo lengi, en ég var bara búinn að fá nóg af þessu taumlausa líkamlega og andlega ofbeldi.“
Valgerður vildi lítið tjá sig um málið en sagðist þó alveg vita hvað hún syngur.
Vanan smyglara
vantar að koma tonni af ópíum frá Hull til Grindavíkur. A.v.á.
Ég sé að fullháttvirtur forseti hins háa Alþingis er með eitthvað bakkaklór eftir ömurðarveisluna sem hann hélt á Völlunum að viðstöddu fámenni í gær.
„Forseti Alþingis harmar að heimsókn danska þingforsetans hafi verið notuð til að varpa skugga á hátíðarhöldin og leyfir sér að trúa því að það sé minnihlutasjónarmið að viðeigandi sé að sýna danska þingforsetanum óvirðingu þegar hann sækir okkur heim og kemur fram fyrir hönd danska Þjóðþingsins og dönsku þjóðarinnar.“ — segir forseti.
Ég mótmæli herra forseti.
Þessi vanhugsaða og alls óvelkomna heimsókn var hreint ekki „notuð“ til að varpa skugga á fjölmilljónapartíið þitt. Heiðursgesturinn flóttalegi sá alveg sjálfur um að varpa sínum skoðanamyrka skugga á hátíðahöldin og eyðileggja þau gersamlega.
Það eru miklu fremur Danir sem sýna okkur óvirðingu með því að senda þessa útdönkuðu rasistapíu hingað — og skömmin er þeirra að púkka upp á hana sem þingforseta yfirhöfuð.
Það er nefnilega míkróminnihlutasjónarmið að halda að það sé í lagi að dubba upp rauðklædda rasista og leiða til hásætis á hátíðarþingfundi á sjálfu Lögbergi. Og það að gera lítið úr gagnrýni á þetta skipulagsslys er ekkert annað ómerkilegt yfirklór og eftirámjálm.
Svo eiga menn bara að drullufrussfretast til að biðjast afsökunar á klúðrinu í stað þess að barma sér undan eðlilegum viðbrögðum við þessum skammarlega undirlægju– og druslugunguhætti.
Góðar stundir.