Talsverð ölvun var á dansleik ellilífeyrisþega í Reykjavík í gærkvöld. Lögregla segir að hringja hafi þurft í börn og afkomendur á þriðja tug eldri borgara yfir áttræðu til að gera þeim að sækja foreldra sína, sem voru drukkin.
Leysa þurfti upp eftirlitslaust „gamlingjapartý“ í vesturhluta borgarinnar þar sem nokkur fjöldi lífeyrisþega var samankominn. Þá var ölvuðum karlmanni á tíræðisaldri ekið til síns heima í nótt en hann fannst rænulítill í snjóskafli í austurborginni.
Lögreglan hafði einnig afskipti af fjórum eldri konum á níræðisaldri sem höfðu keypt áfengi á skemmtistað í borginni. Jafnframt var alvarlegum athugasemdum komið á framfæri við rekstraraðila.
Geislasverð
Blátt geislasverð, 18.000v, til sölu. Einnig á sama stað Jedi sloppur, ljósbrún. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.