Einelti gegn Sigmari Ingimarssyni skrifstofumanni í Hafnarfirði, hefur mjög færst í aukana undanfarið og er nú svo komið að ekki líður sá dagur að honum sé ekki strítt, hann hrekktur, hræddur, hvekktur eða á honum níðst á einn eða annan hátt. Í morgun var húfu hans t.a.m. stolið, í 154. skipti á þessu ári, en á árinu hafa buxur hans verið bleyttar 292 sinnum, hann látinn borða ánamaðka 96 sinnum og honum hrint í drullupoll 81 sinni auk ýmissar óhefðbundinnar stríðni, ofbeldis og eineltis sem of langt mál væri að telja upp.
Er svo komið að hafnfirsk stjórnvöld hafa fordæmt eineltið og hyggjast þau í samstarfi við félagsmálaráðuneyti, dreifa bæklingum og veggspjöldum um skaðsemi eineltis gegn Sigmari Ingimarssyni, skrifstofumanni. Herferðin verður kostuð af Alcan.
Rauðu ástarsögurnar
árgangur 1991-2001 til sölu. Innbundinn í fallegt rautt band með gyllingu. Afgreiðsla vísar á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.