Hinn kunni stjórnmála- og fræðimaður, Össur Skarphéðinsson varð fyrir því óláni á jólanótt að tapa öllum þokka. Svo virðist sem Össur hafi á einu bretti tapað sínum alkunna þverpólitíska sjarma sem og bæði kúlinu og kynþokkanum meðan hann lá sofandi á heimili sínu.
Var í fyrstu talið að Össur hefði lagt sér til munns mengaða (sumir segja vísvitandi eitraða) rjúpu, en eftir læknisskoðun hallast sérfræðingar helst að því að hér sé um svokallaðan pólitískan umskipting að ræða; jafnvel framsóknarmann.
Formaður Samfylkingarinnar lýsti ástandi Össurar sem „áfalli fyrir jafnaðarmennskuna, íslensku þjóðina og ekki síst stjórnmálatískuna á hnattrænum grundvelli.“
Hvítþvottur
Tökum að okkur vandaðan hvítþott fyrir fyrirtæki og einstaklinga. Mikið úrval af fyrirtaks hreinsiefnum. Fullum trúnaði heitið.
Þvottahús Þórmundar og Tuma
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.