Dr. Níels Geirsson, stærðfræðingur, lék í erótískri mynd í léttum dúr á sínum yngri árum, þegar hann var við doktorsnám í Þýskalandi, en Níels er sennilega þekktastur fyrir afburða rúm- og hornafræðisannanir sínar.
Segir Dr. Níels myndina, sem í íslenskri þýðingu nefnist „Ævintýri Tuma Þumals“ hafa verið afar sakleysislega, „miðað við margt sem maður sér í dag“ - hann hafi aðeins komið fram í einni senu ásamt ungum Þjóðverja, Günther, sem hann er raunar enn í bréfasambandi við.
Dr. Níels segist ekkert skammast fyrir þetta hliðarspor á annars óaðfinnanlegum fræðaferli. Segir hann það raunar teljast til undantekninga innan raungreinaheimsins að menn taki ekki slíkum kostaboðum þegar þau berast.
Vel með farið
eintak af spennusögunni „Þrír um leyndarmálið“ fæst í skiptum fyrir heillegar snjóþvegnar gallabuxur. Fullum trúnaði heitið.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.