Alþjóðlegi leyniþjónustumaðurinn og njósnarinn Magnús er látinn, 38 ára að aldri.
Magnús njósnaði um árabil fyrir sveitarfélagið Húnaþing vestra, einkum á sviði iðnaðar- og kaupfélaganjósna, en síðar fyrir landbúnaðarráðuneyti þar sem hann gat sér gott orð fyrir öflugar og nákvæmar búnaðarnjósnir, bæði hér heima og erlendis.
Árið 2001, þá aðeins 33 ára, var Magnús skipaður yfirmaður sérstakrar njósnadeildar utanríkisráðuneytis á sviði viðskipta- og alþjóðanjósna og hlaut um leið leyniþjónustunúmerið 1488 sem festist fljótlega við hann.
Magnús lét lífið við skyldustörf á alþjóðlegri ráðstefnu um frystingu fiskafurða í Ghana. Fyrir slysni var síldartunna, sem Magnús dvaldist í við njósnir sínar, djúpfryst á einum sýningarbásnum og því fór sem fór.
Magnús lætur eftir sig gullfiskinn Sherlock auk stærsta og fullkomnasta smókingjakkasafns Norðurlanda.
Reikistjarna
lítið notuð reikistjarna ásamt þremur tunglum fæst fyrir lítið, hentar vel fyrir lítil súrefnisháð lífríki. Frábær staðsetning í fallegu sólkerfi. Skipti á minni plánetu koma til greina.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.