Hasse Blomkvist, Svíi, hefur verið gerður útlægur frá landi sínu vegna landráðs. Er ástæðan sögð „niðrandi og svívirðileg ummæli um menningu og sögu Svíþjóðar“ og er hann þannig talinn hafa „reynt að grafa undan stoðum stjórnkerfis landsins og tilvist þess sem sjálfstæðs ríkis,“ eins og segir í dómsskjölum.
Upptök málsins má rekja til orða sem Hasse lét falla í samkvæmi að honum þætti bækur Astrid Lindgren „bara ekkert spes, þannig...“ Mikið uppnám varð í veislunni í kjölfarið og þurftu margir gesta að leita sér áfallahjálpar.
Var Hasse umsvifalaust handtekinn og fluttur fyrir dómara, sem svipti hann ríkisborgararétti og lét flytja hann að landamærum Noregs og Svíþjóðar.
Atvinna óskast
Doktor í Egyptafræðum óskar eftir þægilegri innivinnu. Eða útivinnu. a.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.