Fjárfestingafélagið FL-Group festi fyrr í dag kaup á Sinfóníuhljómsveit Íslands. Hljómsveitin, sem hingað til hefur verið í meirihlutaeigu íslenska ríkisins hefur verið rekin með allnokkrum halla undanfarin ár. Að sögn Hannesar Smárasonar, forstjóra FL-Group, liggja þegar fyrir áætlanir um hagræðingu til að snúa rekstrinum við. Í því sambandi benti Hannes sérstaklega á slaka hljóðfæranýtingu, einkum hjá fiðlu- og óbóleikurum. "Í fyrra var hljóðfæranýtingin einungis 83% yfir árið, eða 0.8% lélegri en árið 2004. Með öðrum orðum eru 17% hljóðfæranna óvirk í hverri nótu að meðaltali. Það segir sig sjálft að við getum náð kostnaði niður umtalsvert með fækkun starfsmanna. Við munum einnig hvetja starfsmenn okkar til að læra á fleiri hljóðfæri til að nýta krafta þeirra betur".
Ekki stendur til að sameina rekstur hljómsveitarinnar og Flugleiða að svo stöddu, en þó er reiknað með að sveitin verði notuð til að framleiða lendingartónlist og koma fram á árshátíðum fyrirtækja FL-Group.
Herbergi
45 fm til leigu með öllum þægindum, þ.m.t. salerni. Hentugt fyrir þingmann. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.