Lögreglan á Selfossi hafði í gærkvöldi afskipti af tveimur tölum sem voru á puttaferðalagi í gegnum bæinn. Þegar þær voru færðar til yfirheyrslu og taldar kom í ljós að þær innihéldu hvor um sig tíu tölur. Var þá haft samband við Hagstofu Íslands sem staðfesti að þar voru á ferðinni kennitölur sem sloppið höfðu þaðan fyrr í vikunni.
Lögregluembætti víðsvegar um landið hafa undanfarið haldið uppi ströngu eftirliti með tölum á þjóðvegum landsins. Er þetta liður í aðgerðum stjórnvalda til að sporna við vandamálum samfara síauknu kennitöluflakki.
Kona óskast
á skuttogara. Þarf að vera þolgóð og útsjónarsöm.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.