Nokkrir íslenskir veiðimenn hafa "skipt um lið", eins og þeir orða það, og hyggjast veita rjúpnaveiðimönnum vopnaða mótspyrnu á hálendinu í haust. Ástæðu sinnaskiptanna segja þeir fyrst og fremst vera varnarleysi rjúpunnar sem einfaldlega sé ekki verðugur andstæðingur, en einnig "möguleikann á að komast loksins í alvöru átök".
Varnarbandalagið segist munu flytja inn jarðsprengjur og sprengjuvörpur frá byrgjum í N-Kóreu, auk þess sem sænsk hátækniflugskeyti verði keypt í því augnamiði að skjóta niður þyrlu Landhelgisgæslunnar - enda hafi hún margsinnis verið notuð til að aðstoða rjúpnaveiðimenn í kröggum.
Gefins prentari
Vandaður prentari fæst gefins. Reykir ekki. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.