Spilaklúbburinn Tígulþristur hélt í dag upp á það að í fyrsta sinn í 14 ára sögu félagsins voru liðsmenn aðeins fjórir, en ekki fimm.
„Þetta hefur alla tíð háð okkur því þetta er sko bridsklúbbur og það er bridsáhuginn sem heldur félagsskapnum saman. Hins vegar höfum við yfirleitt endað á því að spila veiðimann eða ólsenólsen vegna þess að við vorum of margir,“ sagði talsmaður félagsins.
Hann segir ákvörðunina um að losa sig við Tobba, eða Þorbjörn Magnússon, tannsmið ekki hafa verið erfiða. „Nei, Tobbi var fyrsta val okkar allra, ekki spurning. Hann átti enga fjölskyldu og enga vini, nema okkur auðvitað - auk þess sem hann kunni ekki einu sinni brids, held ég. “
Fallöxi
óska eftir að kaupa vel með farna fallöxi, til heimilis- og einkanota eingöngu. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.