Hallgrímur Helgason, rithöfundur, hefur orðið uppvís að því að skrifa níðyrði um Ísland í einum virtasta fjölmiðli Danaveldis. Á vefsíðum Weekendavisen.dk má lesa hvernig þessi fyrrum efnilegi rithöfundur og sonur Íslands svívirðir landa sína á tungu sjálfra Nýlendukúgarana. Meðal svívirðinga Hallgríms má nefna illt umtal um náttúru Íslands, og getur að líta setningar á borð við “Islands indre højland er dødkedeligt”. Og ekki lætur hann þar við sitja heldur ræðst hann einnig á Íslandvini: “Island er det land i verden, som tiltrækker de kedeligste turister”. Að sögn Bjarna Stolz, lögreglufulltrúa hjá RLR mun Hallgrímur hafa þegið umtalsverða fjármuni fyrir skrifin. Hallgrímur er um þessar mundir staddur í Lundúnum og hefur utanríkisráðuneytið farið fram á að fá hann framseldan.
Smjörklípur
af öllum stærðum, með og án salts. Nást seint og illa úr fatnaði. Afgreiðsla vísar á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.