Það má segja að bylting hafi orðið í þróun farsíma með tilkynningu lúxembúrgíska raftæknifyrirtækisins Trendtronix í gær, þess efnis að uppfinningamenn þess hefðu þróað svokallaða fjórðu kynslóð farsíma. Helsta nýjungin er sú að hann gengur fyrir sólarorku og þarf þ.a.l. ekki að hlaða hann í tíma og ótíma. Hann er einnig afar meðfærilegur, á sérstökum hjólavagni úr títaníumblöndu sem auðvelt er að draga, nú eða spenna fyrir hund. Símanum fylgir einnig nákvæm skeiðklukka og númeraminni fyrir allt að 12 símanúmer. Búist er við að síminn komi á markað skömmu eftir áramót.
Kennitöluflakkarar
Mikið af skemmtilegum og töff nöfnum að losna. Kynnið ykkur úrvalið. Fyrirtækjaskrá.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.