Ákaflega skemmtileg tilviljun átti sér stað snemma í morgun fyrir utan ólöglegan strútabúgarð í Mosfellsdal.
Þrír grútskítugir pólskir námaverkamenn á leið úr Eurovisionpartíi gengu þar fram á tvo dæmda, örvhenta fjöldamorðingja á flótta undan bandarísku alríkislögreglunni í sömu andrá og hin þekkta söngkona Kate Bush kom þar aðvífandi með fótbrotinn hana í fanginu.
Miklir fagnaðarfundir urðu með hópnum því þau höfðu öll setið námskeið í kemískum tannréttingum í Kramhúsinu fyrir réttum10 árum.
Það sem var þó merkilegt við þetta var að ekkert þeirra var búið að sjá nýju Stjörnustríðsmyndina.
Nauðungaruppboð
Hreindýrasleði. Átta hreindýr. Rauður galli (XXXL) og nýuppgerð stúdíóíbúð á Norðurpólnum (áhvíl. 87 millj.).
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.