Mikill órói er innan kvenfélaga víða um land eftir að orðrómur komst á kreik um að lögregluyfirvöld hefðu ítrekað vanhelgað rauðu ástarsögurnar við yfirheyrslur á meintum femínistum og lesbískum hermdarverkaöflum innan íslenska kvenfrelsishersins.
Dæmi eru um að allri seríunni hafi verið sturtað niður um lítt eða illa þrifnar salernisskálar, kjaftað hafi verið frá endi nokkurra vinsælustu sagnanna og þær jafnvel lesnar upphátt með svokallaðri grínrödd.
Hafa tíðindin mælst afar illa fyrir hjá bókstafstrúarkonum víða um land og hefur viðbúnaðarstig m.a. verið fært upp í appelsínugult hjá sýslumanninum á Ísafirði eftir að kvenfélagið Hvöt í Hnífsdal lagði eld að hópi norskra túrista í mótmælaskyni.
Til að fyrirbyggja misskilning er rétt að taka það strax fram að þessi frétt var afskaplega illa unnin, öll heimildavinna til háborinnar skammar og bæði blaðamaður og ljósmyndari venju fremur illa fyrir kallaðir við gerð hennar. Vill ritstjórn Baggalúts því nota tækifærið og draga hana þegar í stað til baka.
Ódýrt!
Dúnmjúk og seiðandi vasaló. Hentar í allar gerðir vasa. Næg bílastæði.
O. Bergmann & Wium.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.