„Sko - skrifstofustjórinn var búinn að segja að við ættum að skiptast á,“ sagði Már Másson, sérfræðingur í landbúnaðarráðuneytinu í samtali við Baggalút í morgun. Már hefur átt í hörðum deilum við vinnufélaga sinn, Einar Lárusson - sem einnig er sérfræðingur - vegna afnota af rauðum heftara af gerðinni Leitz Stabletech 900, sem Einar vill ekki leyfa Má að nota.
„Sko, ég veit allt um þessa reglu um að við eigum að skiptast á og svona - ég veit það alveg að maður á að leyfa öðrum að prófa, en þetta er bara minn heftari“, sagði Einar þegar Baggalútur náði tali af honum vegna málsins. „Auk þess vildi Már ekki lána mér gatarann sinn í fyrra“.
Málið hefur verið tilkynnt vinnueftirliti ríkisins.
Lifandi fallbyssukúla
(fjárhagslega sjálfstæð) óskar eftir að kynnast reyklausum síamstvíburum, helst kvenkyns. Með nánari kynni í huga. Afgreiðsla vísar á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.