„Ég veit nákvæmlega hvað liggur hér að baki og það er gersamlega óþolandi að slík mismunun viðgangist í siðuðu þjóðfélagi,“ sagði Bjarni Einvarðsson taugaskurðlæknir, foxillur í viðtali við Baggalút - en enn og aftur var gengið fram hjá honum þegar ráðið var í stöðu yfirlæknis á Landsspítala-Háskólasjúkrahúsi.
Flestir eru sammála um að Bjarni hafi algera yfirburði hvað snerti menntun, starfsreynslu og hæfni til að gegna starfinu, en engu að síður var honum tjáð að ekki væri talið unnt að ráða hann vegna „hugmyndafræðilegrar skörunar við ímynd sjúkrahússins,“ eins og það var orðað.
„Af hverju segja þessir fasistar það ekki bara hreint út - þau vilja ekki ráða mig vegna þess að ég er Votti - það er ekki flóknara en það.“
Munum eftir bankamönnunum
Nú er hart í ári hjá litlu bankamönnunum, sem eru vanir sífeldu góðæri síðan þeir klöktust út úr háskóla. Við mælum með að þeim sé gefið bankabygg, sem má nálgast í kjörbúðum.
Bankamannavinafélagið
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.